Жозеф Байден Франция билан муносабатларни яхшилашга ҳаракат қилмоқда — Жон Керри
АҚШ президенти Жозеф Байден Франция билан муносабатларни яхшилашга ҳаракат қилмоқда. Бу ҳақда унинг иқлим масалалари бўйича махсус вакили Жон Керри маълум қилди.
"Сизни ишонтириб айта оламанки, Америка президенти икки томонлама муносабатларни яхшилаш ғоясига содиқ ва шу йўналишда ҳаракат қилмоқда. У майда муаммоларни четга суриб келажакка қараяпти. Аминманки, давлатларимиз ўртасидаги яхши муносабатларни қайта тиклаш мумкин",— деган Керри BFMTV телеканалига берган интервьюсида.
Шунингдек, унинг қўшимча қилишича, Байден мавжуд вазият юзасидан Керри билан маслаҳатлашган. Сиёсатчи Байден французларнинг АҚШ тўғрисида қандай таассуротга эга эканини билмаганини ҳам айтиб ўтган.
Сув ости кемаларининг икки давлат муносабатларига таъсири ҳақида ҳам гапирган: "АҚШнинг Франция билан муносабатлари ушбу вазиятдан кўра анча юқорида туради. Душанба куни президент Макрон билан музокаралар ўтказиб, ўртамизда ҳамон ўзаро келишувлар борлигини ва биргаликда амалга оширадиган жуда кўп ишларимиз борлигини англадим", — деган. Шу билан бирга Байденнинг Макрон билан учрашиши эълон қилинган.
Аввалроқ Европа Иттифоқи Австралия билан эркин савдо тўғрисидаги музокараларни кечиктиргани ҳамда Франция Канберра билан эркин савдо шартномасининг имзоланишига қарши чиққани хабар қилинганди.
Жаҳонгир Қўзиев
