Ҳарбий хизматга чақирилишда бўлган янгиликлардан хабардормисиз?

 

 

Қонунга мувофиқ энди сафарбарлик чақируви резервидаги хизматга ўтган фуқаролар ойлик ҳарбий йиғинларни ўтаганларидан сўнг Қуролли Кучлар резервига ўтказилиши белгиланди. Бундан олдин бу тартиб бошқача, яъни ойлик ҳарбий ҳизматни ўтаганлар фақат 27 ёшга тўлгандан кейин Қуролли Кучлар резервига ўтказилар эди.

 

Шунингдек, чақирув участкаларида қайд этиш ишлари фуқаронинг умумий ўрта, ўрта махсус ёки бошланғич профессионал таълим муассасаларидаги охирги ўқиш йилининг октябрь-ноябрь ойларида амалга оширилиши белгиланди. Аввалги ҳужжатда бу охирги ўқиш йилининг апрель — май ойларида амалга ошириларди.

 

Меҳнатга қобилиятсиз, яъни нафақада ёки ногирон бўлган ёхуд ота-онанинг ёлғиз ўғли бўлиб, уларни боқиши лозим бўлган вазият мавжуд бўлса, шунингдек, меҳнатга лаёқатли вояга етган бошқа ўғли бўлмаса, унда муддатли ҳарбий хизматга чақирилмаслиги белгиланган эди.

 

Эндиликда ушбу чақирилувчилар ўзи, ота-онаси ёки уларнинг ўрнини босувчи шахсларнинг розиликлари билан муддатини кечиктирмасдан ҳарбий хизматга чақирилишлари мумкин.

 

Бундан ташқари, ҳарбий хизматчиларнинг, олий таълим муассасалари курсантларининг, ҳарбий йиғинларга чақирилган ҳарбий хизматга мажбурларнинг ва сафарбарлик чақирувчи резервидаги хизматни ўтаётганларнинг моддий жавобгарлиги ҳам белгиланди.

 

Бунда улар етказилган зарар аниқланган кундан эътиборан 3 йил ичида моддий жавобгарликка тортилиши мумкин.

 

Етказилган зарарларга моддий ва пул маблағларининг талон-торож қилиниши, камомади, беҳуда сарфланиши, йўқотилиши, йўқ қилиниши, шикастлантирлиши, ишдан чиқарилиши ҳамда улардан қонунга хилоф равишда фойдаланилиши каби ҳолатлар киради.

 

Бундан аввал Ўзбекистонлик ҳарбийлар Жанубий Кореяга ўқишга юборилиши, Ўзбекистон ҳарбийлари Афғонистон билан чегарада янги самолётни синовдан ўтказгани ҳамда Меҳрибонлик уйлари Миллий гвардияга бириктирилгани ҳақида хабар берилганди.

 

Оламгир Абдиев