“Толибон”нинг тан олиниши, молиявий манбалар ва “Ахлоқ полицияси” — Забиҳулло Мужоҳид “ТАСС”га интервью берди

 

 

Россия ва бошқа давлатлар билан алоқалар

 

“Биз барча давлатлар билан алоқа ўрнатишга ҳаракат қиляпмиз. Биринчи навбатда, гап дипломатик муносабатлар ҳақида кетмоқда. Россия билан музокара олиб бориляпти, энг асосий масала – бизнинг тан олинишимиз ҳамда элчихоналар очилиши”, – деган Мужоҳид.

 

Элчихоналар ҳақида гапирар экан, ҳозирда энг муҳими Кобул ва Москвадаги дипломатик миссияларнинг одатий иш тартибда фаолиятини давом эттириш зарурлигини қайд этди. Шунингдек, келажакда Афғонистоннинг Россиядаги элчиси алмаштирилиши мумкинлиги маълум қилинди.

 

Мужоҳид Россиянинг муҳим иқтисодий ҳамкор бўлиши мумкинлигини таъкидлади.

 

“Биз иқтисодий ёрдамни олқишлаймиз ва молиявий ёрдамга умид билдирамиз”, – деб айтиб ўтган у.

 

“Толибон”нинг молиявий манбалари  

 

Мужоҳиднинг сўзларига кўра, бож ва солиқлар толибларнинг асосий молиявий манбайи ҳисобланади. Шунингдек, келажакда фойдали қазилмалардан ҳам даромад олиниши мумкинлиги қайд этилди.

 

“Ахлоқ полицияси” фаолияти тикланади

 

Мужоҳид  "Даават ул-Иршод" номли идора тузилганини ва у 90 йилларга нисбатан нозикроқ ҳаракат қилишини маълум  қилди. “Биз одамларни дин кўрсатмаларига амал қилиб яшашга масжид минбарларидан туриб даъват қиламиз”,  — деган ҳаракат расмий вакили.

 

“Ахлоқ полицияси” эса фақат давлат хизматчилари ва хавфсизлик ходимлари учун ишлаши таъкидланди.

 

Бундан аввал “Толибон” ва АҚШ ўртасидаги музокаралар  ҳамда Афғонистонда уруш эҳтимоли сақланиб қолаётгани   хабар қилинганди.

 

 

Жаҳонгир Қўзиев