Қўшни Қозоғистонда “UzAuto Motors” автомобиллари лидерлик қилмоқда
Қозоғистон Автомобил Бизнеси Ассоциацияси (АКАБ) шу йилнинг январ-сентябр ойлари бўйича автомобил савдоси билан боғлиқ натижаларни эълон қилди. Унда “Чевролет Cобалт” ва “Чевролет Нехиа” автомобил моделлари энг кўп сотилган. Бу ҳақда “УзАуто Моторс”нинг ижтимоий тармоқдаги саҳифасида хабар берилди.
Унда айтилишича, қўшни давлатда ушбу давр мобайнида 79 444 дона автомобиль сотилган. Уларнинг тахминан 28,17 фоизи “Chevrolet Cobalt” ва “Chevrolet Nexia” моделларига тўғри келади. Жами 22 383 дона “UzAuto Motors” маҳсулоти сотилган. Бу эса бозорда “лидерлик” дегани.
Таъкидлаш керакки, “UzAuto Motors” автомобиллари сотуви ўтган 2020 йилга нисбатан 5 баробарга ошган.
"Қозоғистонда ушбу моделлар бизнинг мамлакатдагига нисбатан тахминан 1000 долларга қиммат", – дейилади компания хабарида.
Умуман олганда, “АКАБ” ассоциацияси ушбу давр мобайнида енгил автомобилларнинг бозордаги оптимал ўсишини таъкидлади. 2020 йилга нисбатан ўсиш 36,3 фоизни ташкил этган.
Бундан аввал “Кia Uzbekistan” “К8” седанини сотишни бошлагани, “UzAuto Motors” нинг соф фойдаси қарийб 70 фоизга ўсгани ҳамда "Chevrolet Onix" автомобили қачон чиқиши маълум бўлгани ҳақида хабар берилганди.
Оламгир Абдиев
