Хабарингиз бор, ижтимоий тармоқларда “Chevrolet Onix автомобили сотувга чиқди” деган мазмундаги видео юзасидан "UzAuto Motors" муносабат билдирганди.
"UzAuto Motors" компанияси ахборот хизмати маълум қилишича, "Onix" автомобили сотуви 2022 йил охири, 2023 йил бошида йўлга қўйилиши режалаштирилган.
Қайд этилишича, жорий йилнинг август ойида "Chevrolet Onix" va "Chevrolet Traker 2" автомобилларини ишлаб чиқаришни йўлга қўйиш учун Асакадаги заводда зарурий ишлар олиб борилган.
"Chevrolet Onix" автомобилининг биринчи партияси ишлаб чиқарилгандан сўнг, олти ойлик синов муддатидан ўтиши керак. Автомобиллар турли хил иқлим шароитида, ҳар хил йўлларда синовдан ўтказилади. "Onix" автомобилларини серияли ишлаб чиқариш фақат тўлиқ тестдан ўтгандан кейингина бошланади.
Маълумот учун, "Chevrolet Onix" ва "Tracker" битта платформада йиғилади. Янги платформани жорий этиш дастури янги ишлаб чиқариш тизимига ўтишни, автомобиллар қисмларини маҳаллийлаштирилиш ва мослаштиришга имкон беради.
Эслатиб ўтамиз, “UzAuto Motors” ижтимоий тармоқлардаги миш-мишларга изоҳ берганди.
Аввалроқ Ўзбекистонда "Chevrolet Onix"нинг баҳоси қанча бўлиши, "UzAuto Motors" "Chevrolet Onix" ҳамда "Tracker" автомашиналарини йиғишни бошлагани, "UzAuto Motors" "Spark" ва "Lacetti" автомобилларини вақтинча ишлаб чиқариш тўхтатилгани ҳақида хабар берилганди.