Шарҳ: Фарзандликка олиш билан боғлиқ чекловлар аниқ белгиланди
"Фарзандликка олиш тартибининг ҳуқуқий асослари такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида"ги қонун имзоланди.
Энди фарзандликка олишни истисно қилувчи жиҳатлар янада аниқ белгиланди. Шу билан бирга кимлар “фарзанд асраб олиш” ҳуқуқига эга эмаслиги ҳам тасдиқланди.
Жумладан, ҳаётга, соғлиққа, жинсий эркинликка, оилага қарши хатти-ҳаракатларни амалга оширган фуқаролар бундай ҳуқуқдан фойдалана олмайди. Шунингдек, ўзганинг мол-мулкини талон-тарож қилиш, гиёҳвандлик воситалари билан боғлиқ ва яна шунга ўхшаш бир қатор жиноятларни қасддан содир этган шахслар ҳам фарзандликка олиш ҳуқуқига эга эмас.
Илгари ҳар қандай жиноятни қасддан содир этган шахс бола асраб олиш ҳуқуқидан маҳрум қилинган эди.
Инчинун бола соғлигига хавф туғдирадиган касаллиги бор шахслар ҳам фарзандликка олиш ҳуқуқига эга эмас.
Фарзандликка олиш шахснинг аризасига, васийлик ва ҳомийлик органлари тавсиясига кўра амалга оширилади. Бунда мазкур тартиб фуқаролик ишлари бўйича суд қарори билан амалга оширилади.
Бундан аввал энди жазо муддатини ўтаганлар ҳам фарзанд асраб олишлари мумкинлиги ҳамда "Меҳр дафтари" тизими ва унга кимлар киритилиши ҳақида хабар берилган эди.
Оламгир Абдиев
