Набережние Челнида кўп қаватли уйда газ портлаши оқибатида уйнинг тепа қисми қулаб тушди
Қутқарувчилар бир соат ичида бетон қолдиқлари орасидан тирик қолган тўрт нафар, жумладан, икки ёш болани олиб чиқди.
Кеча тунда Набережние Челнида 5 қаватли уйнинг 4 чи қаватида кучли газ портлаган. Натижада уйнинг бешинчи қавати қулаб тушган: олтита хонадон вайрон бўлган.
Фавқулодда Вазиятлар Вазирлигининг Республика бош бошқармаси матбуот хизмати раҳбари Андрей Родигиннинг маълум қилишича, хабар 17:30 да келиб тушган. Воқеа жойига 5 дақиқада тез ёрдам ва қутқарув бригадаси етиб келган.
Бир соат ичида бетон қолдиқлари орасидан 4 нафар одам қутқарилиб яқин атрофдаги шифохоналарга зудлик билан ётқизилган. Ҳозирда жонлантириш бўлимида ҳаёти учун курашишмоқда.
Портлаш содир бўлган уйнинг биринчи қаватида яшовчи Гўзалнинг айтишича, у ўша вақт уйда бўлган.
—Тўсатдан мен кучли портлаш овозини эшитдим, ҳамма жой ер силкинганидек бўлди, ойналарим синиб кетди. Аввалига тушунмадим сўнг кўчага болаларим билан отилиб чиқдим , — дейди у.
Гувоҳларнинг айтишича, портлаш шу даражада кучли бўлганидан ҳатто ойна ва бетон бўлаклари юзлаб метр олисга учиб кетган. Бино йўл ёқасида бўлгани учун бетон бўлаклари сфетофорда тўхтаган машина ойналарига ҳам зиён етказган.
Ҳозирда суриштирув ишлари давом этмоқда.
Аввалроқ,Навоийда газ қуйиш шахобчаси портлагани ҳамда Наманганда масжид қурилиши пайтида қўшни уй дарвозахонасининг том қисми қулаб тушгани ҳақида хабар берилганди.
Муножат Валиева
