Коррупцияга қарши курашиш бўйича ўқув-семинарда хориж тажрибаси тақдим этилади
Коррупция нафақат давлат, балки уни бунёд этадиган жамият илдизига ҳам болта уради. У бор ерда ҳеч қандай ривожланиш бўлмайди.
Қурилиш вазирлигида “Коррупцияга қарши курашиш ва манфаатлар тўқнашуви” мавзусида ўқув-семинар бошланди.
Унда КПМГ (Италия) экспертлари Ирина Бурдикова ва Пётр Сердюк ўз тажрибалари билан ўртоқлашади. Бундан кўзланган мақсад, коррупция иллатлари ва уни бартараф этиш тажрибаларини вазирлик тизими, унинг ҳудудий ва таркибий бўлинмалари ходимлари эътиборига етказишдир.
Қонунни юргизадиган бўғин ҳисобланадиган ҳукумат органлари учун, албатта, бундай чора-тадбирларни амалиётда қўллаш лозим. Чунки ана шундан кейингина ундан қутилиш мумкин. Жамоат назорати ва ходимнинг мажбуриятлари ҳам бошқарувни тўғри шаклланишига ёрдам беради.
Ўқув-семинарга КПМГ Россия ва МДҲ хавф-хатар консалтинг ташкилотларидан экспертлари таклиф қилинган. Ўқув жараёни 5 йўналишда ташкил этилмоқда.
Экспертларнинг фикрича, коррупция фақат пул эмас, ҳатто совға кўринишида ҳам бўлиши мумкин. Ойликнинг камлиги, ходимларнинг иш жараёнидан қониқмаслиги коррупцияга йўл очади. Бунинг учун эса ходим, албатта, маошидан қониқиши лозим.
Бундан аввал соғлиқни сақлаш тизимида 30 миллиард сўмдан ортиқ маблағ талон-торож қилингани маълум қилгани, МИБ томонидан 742 минг 476 та ижро ҳужжатининг муддати бузилган ҳолда ижро этилгани ҳамда Коррупцияга қарши курашиш ишларининг рейтинги жорий этилиши ҳақида хабар қилинганди.
Оламгир Абдиев
