МИБ томонидан 742 минг 476 та ижро ҳужжатининг муддати бузилган ҳолда ижро этилган
Сенатнинг Суд-ҳуқуқ масалалари ва коррупцияга қарши курашиш қўмитаси раиси Н.Умаров суд ҳужжатлари ва бошқа органлар ҳужжатларининг ижро этилиши ҳолати юзасидан Мажбурий ижро бюросига парламент сўрови юбориш тўғрисидаги масала юзасидан муносабат билдирди.
Унинг таъкидлашича, қўмита томонидан мазкур соҳага доир норматив-ҳуқуқий ҳужжатларнинг ижроси, шунингдек, суд ҳужжатлари ва бошқа органлар ҳужжатларини ижро этиш ҳолати ўрганиб чиқилган. Таҳлиллар асосида бугунги кунда Бюро органларининг фаолиятида айрим камчиликлар мавжуд эканлиги аниқланди.
Хусусан, маълумотларга кўра, Бюро органлари 2020 йил 1 январь ҳолатига жиноят, маъмурий, фуқаролик, иқтисодий судлар ва бошқа органларнинг жами 48,7 триллион сўмлик 3 ммиллион 788 минг 927 та ижро ҳужжати иш юритувда бўлган. Йил давомида 34,5 триллион сўмлик 2 миллион 698 минг 476 та ижро ҳужжати тамомланган ва тугатилган. Шундан 2 миллион 124 минг 591 та (56 %) ижро ҳужжати бажарилиб, 15,1 триллион сўм (31 %) ундирилган. Амалда ундирилганларнинг 7,6 триллион сўмлик 742 минг 476 та ижро ҳужжатининг муддати бузилган ҳолда ижро этилган.
2021 йил 1 январь ҳолатига 14,2 триллион сўмлик 1 090 451 та ижро ҳужжати қолдиқ бўлиб ўтган. Шулардан, 3,2 триллион сўмлик 368 250 таси (40 %) икки ойлик муддати ўтган ижро ҳужжатлари ҳисобланади.
Шунингдек, ҳуқуқни қўллаш амалиётида ҳам қатор муаммо ва камчиликлар мавжуд.
Эслатиб ўтамиз, аввалроқ mib.uz мобил иловасининг ишга тушгани ҳамда Қашқадарёда фуқаролар МИБ ходимларининг устидан бензин сепиб, ёқиб юбормоқчи бўлгани ҳақида хабар берилганди.
Баҳринисо Мадумарова тайёрлади.
