Ўзбек мультфильми халқаро фестивалда иштирок этади
Ҳар йили 28 октябрь "Халқаро анимация куни" (International Animation Day) сифатида нишонланади. Бу йил ушбу фестивальда Ўзбекистон номидан Кинематография агентлиги буюртмасига биноан суратга олинган “Ғилдиракли уй” (“Дом на колесах”) мультфильми иштирок этмоқда.
Сценарий муаллифи Дмитрий Власов, режиссёр Азиз Муҳаммедов, композитор Жамшид Изамов.
Қозоғистон Республикаси Туркистон шаҳрида анимацион кино байрами муносабати билан 2019 йилдан буён “Amen” халқаро анимацион фильмлар фестивали ўтказиб келинмоқда. Унда анимация соҳасида ёш истеъдодларни қўллаб-қувватлаш, янги инновацион технологиялар ва замонавий дастурлар асосида ишлаб чиқарилаётган анимацион асарлар баҳоланади.
Маълумот учун: 1892 йилда франциялик таниқли рассом Эмиль Рейно илк бор мультфильлмга хос бўлган тасвир ишларини эълон қилган. Даврлар мобайнида бу йўналиш ривожлана бошлади.
2002 йилда “Халқаро анимацион кино ассоциацияси” (The International Animated Film Association) ва ASIFA (The International Animated Film Society) ташаббуси билан Эмиль Рейно ижодининг 110 йиллиги кенг нишонланади ва ушбу сана “Халқаро анимация куни” сифатида белгиланади.
2020 йилда мазкур фестивалда Дмитрий Власовнинг “Ҳаёт дарёси” (“Поток”) анимацион фильми “Энг яхши постановкачи рассом” номинацияси бўйича ғолиб бўлган эди.
Эслатиб ўтамиз, бундан аввал Ўзбекистон, Қозоғистон ва Россия ҳамкорлигида Хўжа Насриддин ҳақида мултфильм суратга олиниши ҳамда “Қизалоқ ва маймоқ” дунё бўйича энг кўп томоша қилинган мультфильм бўлгани ҳақида хабар берилганди.
Чўлпоной Аҳмедова
