Сиёсатга энди қайтмайман – Ангела Меркель
Шунингдек, Меркель доимо ўз фаолиятидан завқ олганини таъкидлади.
Германия канцлери вазифасини бажарувчи Ангела Меркель сиёсатдан бутунлай кетишини маълум қилди. Бу ҳақда у DW'га берган интервьюсида айтиб ўтган.
“Сиёсат билан бошқа шуғулланмайман. Сиёсий низоларни ҳал қилмайман – бу билан узоқ йиллар шуғулландим. Ҳозирча кейинги фаолиятим қандай бўлишини билмайман. Аввал бироз дам оламан, кейин нима бўлишини ўйлаб кўраман”, – деган Меркель.
Шунингдек, у бироз тушкунликка тушаётганини, сабаби шу кунгача фаолияти унга завқ бағишлаб келганини таъкидлади. Меркель ҳозирда “хайрлашув турне”ларини амалга ошираётганини қайд этган.
Маълумот ўрнида: Ангела Меркель 2005 йилдан буён Германияни бошқариб келади. У дунёнинг энг таъсири баланд сиёсатчиларидан бири ҳисобланади.
Бундан аввал Макрон Меркелни юксак орден билан мукофотлагани ҳамда Германия президенти Ангела Меркелдан канцлер вазифасини бажариб туришни илтимос қилгани ҳақида хабар қилинганди.
Жаҳонгир Қўзиев
