Японияда пандемия шароитида аҳолини қўллаб-қувватлаш мақсадида янги имтиёзлар жорий қилиниши мумкин
Унга кўра, йиллик даромади 85 минг АҚШ долларидан паст бўлган оилаларга қўшимча тўлов берилади.
Японияда аҳолини пандемия шароитларида қўллаб-қувватлаш мақсадида 18 ёшгача бўлган болаларга 880 АҚШ доллари миқдорида ижтимоий тўлов берилиши маълум бўлди. Бу ҳақда Kyodo агентлиги хабар қилди.
Бу сумманинг ярми ёш болали оилаларга банк орқали ўтказиб берилади, ярми эса купон тариқасида тақдим этилади. Бу купонга кейинчалик турли товарлар сотиб олиш учун ишлатилиши мумкин. Аммо ҳукумат бу каби ёрдам пулини йиллик даромади 9.6 миллион иен (85 минг АҚШ доллари)дан паст бўлган оилаларга беради.
Болаларга қўшимча ижтимоий тўлов бериш ҳукуматнинг пандемия оқибатларини юмшатишга қаратилган янги молиявий пакетининг бир қисми ҳисобланади. Бу пакетнинг умумий қиймати 265 миллиард АҚШ долларини ташкил этади. Ушбу режа ноябрь ойи охирида маъқулланиши кутилмоқда.
Аввалроқ “Qatar Airways” авиакомпанияси пандемия даврида 4 миллиард доллардан ортиқ зарар кўргани ҳамда Байден пандемия бўйича янги глобал саммит чақирмоқчилиги ҳақида хабар қилинганди.
Жаҳонгир Қўзиев
