Қинғир ишнинг қийиғи ошкор бўлди

 

Ўзбекистонда рангли металлар ички бозорини ҳимоя қилиш, ишлаб чиқарувчиларни хом-ашё билан таъминлаш мақсадида рангли металлар парчалари ва чиқиндиларини республика ҳудудидан ташқарига олиб чиқиш тақиқланган. 

 

Тошкент шаҳар божхона бошқармаси “Арқбулоқ” ташқи иқтисодий фаолият божхона пости ходимлари Контрабандага қарши курашиш ва божхона аудити бўлими ходимлари билан ҳамкорликда навбатдаги қинғирликни фош этди. Юк ҳужжатларида электр токи кучланишини пасайтириш учун мўлжалланган “ректификатор фильтри чоклари” дея кўрсатилган товарлар автоматик тарзда “қизил” йўлакка ўтган. Пост ходимлари юк эгалари ва холислар иштирокида мазкур товарлар ортилган юк автотранспорт воситасини кўздан кечирилган.

 

Текширув давомида транспорт воситасида “ректификатор фильтри чоклари” дея кўрсатилган товарлар умуман йўқлиги, уларнинг ўрнига эса оғирлиги 21,9 тонна бўлган 20 дона қутида мис рангли металл парчалари борлиги аниқланган.

 

Ҳозирда мазкур ҳолат юзасидан суриштирув ҳаракатлари олиб борилмоқда.

 

Аввалроқ Андижонда 250 миллион сўмлик ноқонуний телевизорлар фош этилгани ҳамда Бухорода ноқонуний фреон газ баллонларини олиб киришга бўлган уринишнинг олди олингани ҳақида хабар берилганди. 

 

Муножат Валиева