Қишда бир миллион афғон болалари очликдан ҳалок бўлиши мумкин
Афғонистонда айни вақтда 8,7 миллион киши очарчилик ёқасида.
Бу ҳақда БМТ таҳлилига таяниб “The New York Times” хабар берди.
Қарийиб тўрт ойлик “Толибон” ҳукмронлигидан сўнг мамлакат кўплаб гуманитар инқирозларга, жумладан, озиқ-овқат танқислигига дуч келмоқда.
Дастлабки ҳисоб-китобларга кўра, 22,8 миллион киши – мамлакат аҳолисининг ярмидан кўпи потенсиал ҳаёт учун хавф туғдирувчи озиқ-овқат етишмаслигидан қийналмоқда. Бунга қисман "Толибон" ҳокимиятни эгаллаб олиши ортидан келиб чиққан иқтисодий таназзул сабаб бўлган. Чунки АҚШнинг бир гуруҳ жангариларга қарши санкциялари мамлакатни яккалаб қўйган ва халқаро ташкилотларга ёрдам етказишни қийинлаштирган.
Бундан ташқари, Афғонистонда тиббиёт тизими ҳам жар ёқасида: "Толибон" Кобулга бостириб кирганидан сўнг тиббий ёрдам учун 600 миллион доллардан ортиқ маблағ музлатилган.
Аввалроқ Жаҳон банки Афғонистонга гуманитар ёрдам учун маблағ ажратгани хабар қилинганди.
