Туркманистон ИҲТнинг Афғонистон бўйича саммитида иштирок этади
Мазкур саммитга таклиф этилган “Толибон” делегациясига ташқи ишлар вазири Амир Хон Муттаки бошчилик қилади.
Туркманистоннинг расмий хабарига кўра, президент Гурбангули Бердимуҳамедов ҳукумат йиғилишида видеоалоқа орқали тегишли фармойишни имзолаган ва Туркманистон афғонларга ёрдам беришда давом этишини билдирган.
Жумладан, Афғонистон ва минтақанинг ижтимоий-иқтисодий ривожланишига ҳисса қўшадиган янги қўшма лойиҳаларни амалга оширишини ҳам таъкидлаган.
Туркманистон делегацияси 18-20 декабрь кунлари Исломободда бўлади. Дастлаб Саудия Арабистони Афғонистон масалалари бўйича Ислом ҳамкорлик ташкилотининг (Россия кузатувчи мақомига эга) навбатдан ташқари саммитини ўтказиш ташаббуси билан чиқди.
Бундан ташқари, ИҲТ саммити доирасида “кенгайтирилган учлик” давлатларининг Афғонистон бўйича махсус элчиларининг учрашуви ҳам бўлиб ўтади.
Эслатиб ўтамиз, аввалроқ "Толибон" Ғарб давлатларидан санкцияларни бекор қилишни сўрагани ҳамда Ўзбекистон Қатарда "Толибон" ҳаракати билан музокара ўтказгани ҳақида хабар берилганди.
Чўлпоной Аҳмедова
