Навоийда 97 та тендер савдолари ноқонуний ўтказилгани аниқланди
Ҳозирда 61 та ҳолат юзасидан иш қўзғатилган.
Монополияга қарши курашиш қўмитасининг Навоий вилоят ҳудудий бошқармаси томонидан жорий йил биринчи ярим йилликда 43645 млн сўмлик 191 дан ортиқ танлов (тендер) савдоларида ўрганишлар ўтказилган бўлиб, шундан 97 тасида “Рақобат тўғрисида”ги қонун талаблари бузилиш ҳолатлари аниқланди.
Аниқланган 36 та ҳолат бўйича ҳуқуқ тартибот органларига маълумотномалар киритилган ва 61 та ҳолат юзасидан иш қўзғатилиб, қонун бузилиш ҳолатларини бартараф этиш бўйича бажарилиши мажбурий бўлган кўрсатмалар берилган.
Бундан ташқари, 2022 йил 7 июнда буюртмачи Учқудуқ туман Мактабгача таълим бўлими томонидан 5-сонли МТТ биносини 279,5 млн сўмга жорий таъмирлаш бўйича ўтказилган электрон энг яхши таклифларни танлаш савдосида “Рақобат тўғрисида”ги қонуннинг 14-моддаси талаблари бузилган.
Ҳудудий бошқарманинг жорий йил 17 июнь кунги хати билан мазкур танлов бекор қилиниб, қайта танловга қўйилиши оқибатида мурожаатчи-танлов иштирокчиси “GARANT UCHQUDUQ” МЧЖ ҳуқуқлари тикланган.
