Дунёда шакар тақчиллиги хавфи кучаймоқда: нархлар 25 фоиздан кўпроққа ошди

Дунёда шакар тақчиллиги хавфи кучаймоқда. Бунга Жанубий яримшарнинг айрим ҳудудларида ёғингарчиликнинг кўпайиши, экватордан шимолда эса қурғоқчилик кузатилаётгани сабаб бўлмоқда. 

 

Об-ҳаво шароитлари дунёнинг йирик шакар ишлаб чиқарувчилари — Бразилия, Ҳиндистон ва Таиландга сезиларли таъсир кўрсатмоқда. Таҳлилчиларга кўра, Эл-Нино шакар бозорига энг кучли таъсир кўрсатувчи табиий ҳодисалардан бири ҳисобланади.

 

Бразилияда ҳаддан ташқари ёғингарчилик шакарқамишни йиғиш ва қайта ишлашни секинлаштирмоқда. Ҳиндистонда муссон ёмғирларининг суст келиши ҳосилдорликка салбий таъсир кўрсатмоқда. Таиланднинг шакар етиштириладиган ҳудудлари эса қурғоқчиликдан зарар кўрган.

 

Европада эса Эл-Нино жазирама тўлқинларни кучайтириб, қанд лавлаги ҳосилига таъсир кўрсатган. Европанинг энг йирик ишлаб чиқарувчиси Францияда шакар ишлаб чиқариш ҳажми 1980 йилдан буён энг паст даражага тушиши мумкин.

 

Шу сабабли жаҳон бозорида шакар нархлари ошмоқда. Жорий йилда унинг нархи 18 фоизга кўтарилган. Таҳлилчилар келгуси 12 ойда оқ шакар нархи яна 20 фоиз атрофида ошиши мумкинлигини прогноз қилмоқда.

 

Эл-Нино бошқа қишлоқ хўжалиги маҳсулотларига ҳам таъсир кўрсатмоқда. Жумладан, Жануби-Шарқий Осиёда гуруч, Ғарбий Африкада какао етиштириш қурғоқчилик сабаб хавф остида. Қаҳва ва пальма ёғи ишлаб чиқариш ҳам об-ҳаво шароитларидан зарар кўриши мумкин.

 

Шу билан бирга, Эл-Нинонинг энг юқори фаоллик даражаси жорий йил охирида кузатилиши кутилмоқда.