Хитой Путинга миннатдорчилик билдирди
Аввалроқ Россия раҳбари Пэлосининг Тайванга ташрифини провокация деб атаганди.
Пекин Владимир Путиннинг Нэнси Пэлосининг Тайванга ташрифи бўйича фикрларини қадрлайди. Бу ҳақда Хитой ТИВ расмий вакили Ван Вэньбинь маълум қилди.
Бундан олдин Путин Пэлосининг ташрифини бошқа давлатлар суверенитетига нисбатан ҳурматсизлик ва олдиндан режалаштирилган провокация деб атаганди.
“Хитой Россия президенти Владимир Путин билдирган позицияни қадрлайди”, – деган Вэньбинь.
Дипломатнинг сўзларига кўра, шу кунга қадар дунёнинг170 давлати Хитойнинг ўз давлат суверенитети ва ҳудудий яхлитлигини сақлаш бўйича ҳаракатларини қўллаб-қувватлади.
Маълумот ўрнида: 2 августда АҚШ Конгресси вакиллар палатаси спикери Нэнси Пэлоси Тайванга ташриф буюрди. Шундан кейин Хитой орол атрофида йирик ҳарбий машғулотлар бошлашини эълон қилди. Тайвань атрофидаги олти нуқтада ўқув машқлари ўтказилган. Бундан ташқари, Пекин Вашингтон билан қатор келишувлардан чиқиб кетди.
Аввалроқ Хитой ТИВ раҳбари Ван И Пекин билан душманлик яхши оқибатларга олиб келмаслигидан огоҳлантирганди.
