Хитой Россиядаги қисман ҳарбий сафарбарликка муносабат билдирди
Пекиннинг Украина можаросидаги позицияси аниқ эканлиги таъкидланган.
Хитой Украина низосининг барча томонларини мулоқот ва музокараларга чақиради. Бу ҳақда ХХР ташқи ишлар вазирлиги расмий вакили Ван Вэньбинь маълум қилди.
“Хитойнинг Украина низоси бўйича позицияси аниқ: биз барча томонларни ўт очишни тўхтатишга ва музокараларга қайтишга чақирамиз, шунингдек, ҳар икки тарафнинг хавфсизлик соҳасидаги қонуний хавотирлари инобатга олиниши зарур”, – дея дипломат Россияда эълон қилинган қисман ҳарбий сафарбарликка ўз муносабатини билдирган.
Маълумот ўрнида: Владимир Путин 21 сентябрь куни Россияда қисман ҳарбий сафарбарлик эълон қилди. Унга кўра, қуролли кучлар захирасида бўлган ва жанговар тажрибага эга 300 минг фуқаро армия сафларига чақирилади.
