Россия Давлат думаси спикери қисман ҳарбий сафарбарлик сабабини очиқлади
У НАТОни РФ аскарларига қарши ҳаракатларда айблаган.
Россияда эълон қилинган қисман ҳарбий сафарбарлик “махсус ҳарбий операция” олдида турган вазифаларга эришишга ёрдам беради. Бу ҳақда РФ Давлат думаси спикери Вячеслав Володин маълум қилди.
“Бугун бизнинг аскарларга қарши ... НАТО кучлари ҳам жанг қилмоқда. Жанговар тўқнашув чизиғи узунлиги 1000 километрдан ортиқ. Тушунтириш учун: улуғ ватан уруши (Россияда Иккинчи жаҳон уруши асосан шундай аталади — Таҳр.) йилларида Украинани озод қилиш учун 4 та фронт ҳаракат қилган. Қуролли кучларимиз сонини ошириш кераклиги кўриниб турибди”, – деган сиёсатчи.
Маълумот ўрнида: Владимир Путин 21 сентябрь куни Россияда қисман ҳарбий сафарбарлик эълон қилди. Унга кўра, қуролли кучлар захирасида бўлган ва жанговар тажрибага эга 300 минг фуқаро армия сафларига чақирилади.
Аввалроқ Хитой Россия ва Украинани ўт очишни тўхтатишга чақирганди.
