Маск: Россияликлар Украинада Starlink’ни бутунлай йўқ қилмоқчи

 

SpaceX асосчиси Илон Маск россияликлар Starlink тизимларини йўқ қилишга ҳаракат қилаётганини билдирди. Унинг фикрича, тизим тез орада бутунлай ишламаслиги мумкин.

 

Миллиардер дунёдаги ва фронтдаги алоқа ўртасида катта фарқ борлигини маълум қилди. Маскнинг сўзларига кўра, ҳарбий ҳаракатлар бўлаётган ҳудудларда телефон линиялари, мобил алоқа устунлари ва бошқа алоқа воситалари йўқ қилинганини таъкидлаган.

 

“Starlink фронтда ишлаётган ягона алоқа воситаси, қолганлари аллақачон йўқ қилинган. Россия Starlink'ни тўхтатишга бор кучи билан ҳаракат қиляпти. Уларни ҳимоя қилиш учун SpaceX катта маблағни мудофаага йўналтирди. Аммо бу вазиятда ҳам тизим йўқ қилиниши мумкин”, – деб ёзган у Twitter саҳифасида.

 

Сўнгги вақтларда Starlink тизимларининг Украинада ишламай қолаётгани тўғрисида хабарлар тарқалди. Бундан ташқари, SpaceX ушбу йўналишни ортиқ молиялаштира олмаслигини маълум қилди.