Фарғонада ҳажга юбориш учун 16 минг доллар олган шахс ушланди
ДХХ бу бўйича вилоятда тезкор тадбирлар ўтказган.
Фарғона вилоятининг Марғилон шаҳрида ҳаж зиёрати билан боғлиқ фирибгарлик ҳолати аниқланди. Бу ҳақда Давлат хавфсизлик хизмати хабар бермоқда.
Қайд этилишича, Марғилон шаҳрида фаолият юритувчи туристик фирма раҳбари я.м. ўзганинг ишончига кириб, уни ва танишини ҳаж зиёратига юбориш эвазига 16 минг АҚШ доллари олган вақтида ашёвий далиллар билан ушланган.
Марғилон шаҳрида фаолият юритувчи бошқа бир туристик фирма ходими А.Т. эса Қўштепа туманида яшовчи фуқарога Ҳаж–2023 визаси расмийлаштириб, ҳаж зиёратига юбориш эвазига талаб қилинган 10 минг АҚШ долларидан 4 минг АҚШ долларини олдиндан олган вақтида қўлга тушган.
Бувайда туманида кузатилган ҳолатда Андижон шаҳридаги туристик фирма вакили М.Ж. Марғилон шаҳрида яшовчи фуқаронинг онасига “Ҳаж–2023” визаси расмийлаштириб, ҳаж зиёратига юбориш эвазига талаб қилинган 8500 АҚШ долларидан 3 минг АҚШ долларини олдиндан олган вақтида ушланди.
Ҳозирда мазкур шахсларга нисбатан Жиноят Кодексининг 25,168-моддаси (фирибгарлик) билан жиноят ишлари қўзғатилиб, тергов ҳаракатлари олиб борилмоқда.
