Ўзбекистонда электр энергияси истеъмоли рекорди янгиланди
Аномал иссиқ фонида Ўзбекистонда соатлик ва кунлик электр энергияси истеъмоли рекорди янгиланди.
Аномал иссиқ фонида Ўзбекистонда электр энергияси истеъмоли 2022 йилнинг ёз ойидаги рекорд кўрсаткичларни янгилади. Бу ҳақда Энергетика вазирлиги хабар берди.
Хусусан, 2023 йил 16 июнда республика бўйича электр энергияси истеъмоли 242,6 миллион киловатт/соатни ташкил этди. 2022 йилнинг худди шу кунида жами 208 миллион киловатт/соат электр энергияси ишлаилтган. Маълум қилинишича, 16 июнь кунги кўрсаткич аввалги йилдагидан 16,6 фоиз ортиқ бўлди.
Шунингдек, энергетика тизимининг соатлик истеъмоли 11 301 мегаваттни ташкил қилди. Бу 2022 йилнинг шу кундаги ҳолатига нисбатан 1 800 мегаватт (18,9 фоиз) ва 2022 йилнинг ёзида қайд этилган мутлақ максимал кўрсаткичдан 500 мегаватт кўпдир.
Маълумот учун, 2022 йилда максимал электр энергияси истеъмоли 27 июлда қайд этилган бўлиб, бу кўрсаткич 239 миллион киловатт/соатни, кундузги истеъмол қуввати 10 800 мегаваттни ташкил қилган.
