Дастурхон атрофидаги одатлар инсонни сотиб қўяди

 

Таомни истеъмол қилиш тезлиги

 

Джульетта Богоссян таъкидлашича, тез овқатланадиганларнинг тиришувчанлик характери уларга ҳар лаҳзадан завқ олишга халал беради. Бундай инсонларнинг атрофидаги танишлари кўп бўлса-да, фақат 2-3 яқин дўстларига вақт ажрата олишади.

 

Секин овқатланувчилар ўз одатларига содиқ ва жуда қайсар бўлишади. Улар худбин ва ўз ҳуқуқларини бошқалардан устун қўювчилардир. Бундай инсонлар нафақат дастурхон атрофида, балки ишда ҳам секин ҳаракатланишади.

 

Ёқимли суҳбатдошлар сиз билан бир вақтда овқатланишни тўхтатишига эътибор қилганмисиз? Улар муросага тез келишади ва бошқалар билан ҳисоблашишади.

 

Агар инсоннинг овқат тановул қилиши графикка асосланган бўлса, у ўз ишини виждонан бажаришга одатланган. Одатда бундай инсонлар кун қандай қилиб ўтиб кетганини билмай қолишади, аммо бажарган ишларидан кўнгиллари тўлади.

 

Дастурхон атрофидаги хулқ-атвор

 

Овқатни татиб кўрмасдан унга туз қўшадиганлар ва менюга қарамай туриб буюртма қилувчилар ҳаётдаги ўзгаришларни қийин қабул қилишади.

 

Аввал бир маҳсулотни еб бўлиб, кейингина бошқасига ўтадиган одам майда икир-чикирларга ҳам эътиборлилиги билан ажралиб туради. Бундай одамлар ишини сидқидилдан бажаради, аммо ўзгаришларни ёқламайди.

 

Агар танишингиз янгиликлардан бош тортиб, доим бир хил таом буюртма қилса, эътиборли бўлинг: одатда бундайлар асабий ва сабабсиз ваҳима қилувчилар бўлади.

 

Официантга саволлар бериб, овқат танлаш бўйича маслаҳат сўрайдиганлар тажрибаларга тайёр ва янги ғояларни амалга ошириш учун тизимга қарши борувчи одамлардир.

 

Таъмлар бўйича танлов

 

Таъм ва ҳид сезишнинг бузилишини тадқиқ қилиш фонди раҳбари Алан Хирш шўр овқатларни ёқтирадиганлар оқим бўйлаб сузувчилар эканини таъкидлайди.

 

Зираворли таомлар моддалар алмашинувини яхшилайди ва организмни қизитади. Бундай маҳсулотларни танловчилар тартибни яхши кўришади ва майда деталларга вақт сарфлашни ёқтиришмайди.

 

Тадқиқотлар аччиқни хуш кўрувчилар жамият қўллаб-қувватлашига эҳтиёж сезишини кўрсатган. Бундай одамлар ютуқлари ҳар сафар эътироф этилишини исташади.

 

Ширинликларни афзал кўрувчилар эса муҳтожларга ёрдам қўлини чўзишга доим тайёр бўлишади.

 

Юқоридаги мисоллар суҳбатдошингизнинг характери ҳақида дастлабки тушунчаларга эга бўлишингиз ва шу билан бирга ўзингизга бир назар ташлашингизга сабаб бўлиши мумкин.