«Ҳудудий электр тармоқлари» 15,2 млн сўмга бир дона шахмат сотиб олди
Ҳолат юзасидан «Ҳудудий электр тармоқлари» маълумот берди.
Ижтимоий тармоқларда «Ҳудудий электр тармоқлари» АЖ 15 млн 200 минг сўмга бир дона ёнғоқдан ишланган шахмат харид қилган, шунингдек, 25 млн 700 минг сўмга бир дона «картина» ва 17 млн 300 минг сўмга бир дона «панно» сотиб олгани ҳақида хабарлар тарқалди. Ҳолат юзасидан «Ҳудудий электр тармоқлари» маълумот берди.
Баёнотда айтилишича, «Ҳудудий электр тармоқлари» АЖ томонидан хорижий экспертлар иштирокида қатор халқаро илмий-техник анжуманлар, нуфузли меҳмонлар ташрифи доирасида тегишли баённома асосида тадбирлар ўтказилиб келинмоқда.
Маълум қилинишича, мазкур тадбирлар қатнашчилари, нуфузли меҳмон ва хориж экспертларига тарқатма материаллари ва эсдалик совғалари тақдим этилиши белгиланган.
«Келтириб ўтилган буюмлар E-харид махсус электрон портали орқали сотиб олиниб, энергетика тармоғига оид халқаро шартномаларни имзолаш тадбирларида нуфузли меҳмонларга совға сифатида топширилган», — дейилади хабарда.
Таъкидланишича, жамият томонидан бу каби эсдалик совғаларни танлашда миллий ҳунармандчилик, халқ бадиий ва амалий санъатини ривожлантириш, соҳа вакилларини ҳар томонлама қўллаб-қувватлаш масалаларига бирламчи ёндашилади.
