Ўзбекистонда мухолифат кучайтирилмоқда

Ўзбекистон Сенатининг саккизинчи ялпи мажлисида парламентдаги мухолифат ҳуқуқларини кенгайтиришга қаратилган муҳим қонун кўриб чиқилиб, тасдиқланди. Бу ҳақда Сенат матбуот хизмати хабар берди.

 

Қонун сиёсий партиялар ўрнини мустаҳкамлаш, сўз эркинлигини таъминлаш ва парламент ишини янада демократлаштириш мақсадида ишлаб чиқилган. Унда Олий Мажлис Қонунчилик палатаси ва сиёсий партиялар фаолиятини тартибга солувчи бешта қонунга ўзгартиш ва қўшимчалар киритиш кўзда тутилган.

 

Эндиликда ўзини парламентдаги мухолифат деб эълон қилган сиёсий партия фракцияси қонун лойиҳаси иккинчи ўқишга етмасдан туриб, муқобил таҳрир киритиш ҳуқуқига эга бўлади. Бу эса парламентда турли фикр ва ёндашувларга йўл очади.

 

Бундан ташқари, мухолифат вакиллари:

 

Қонунчилик палатасидаги бир қўмита раислиги,

 

Икки қўмита раис ўринбосари лавозимларини кафолатли эгаллайди,

 

Ҳар чоракда “Ҳукумат соати” ва парламент сўрови доирасида масала кўтариш ҳуқуқига эга бўлади.

 

Сенаторлар ушбу қонуннинг қабул қилиниши парламент назорати ва қонун ижодкорлигини кучайтиришини, айниқса мухолифатнинг ўрнини аниқ ва амалий жиҳатдан мустаҳкамлашга хизмат қилишини таъкидладилар.

 

Эслатиб ўтамиз, яқинда Халқ демократик партияси ўзини парламентдаги мухолифат деб эълон қилган эди.

 

Шунингдек, 2024 йил ноябрь ойида президент парламентдаги мухолифат фаоллигини ошириш зарурлигини таъкидлаган ва соғлом сиёсий рақобат халқ манфаатларига мос қонунлар қабул қилинишига хизмат қилишини алоҳида урғулаган эди.

 

5 май куни эса Либерал-демократик партия ва “Миллий тикланиш” демократик партияси бирлашиб, “Тараққиёт блоки”ни тузгани мухолифат ва ҳукумат блоки ўртасидаги сиёсий тафовутларни янада аниқроқ кўрсатмоқда.