Тошкент осмонида ёрқин объект кузатилди: мутахассислар дастлабки хулосани берди
Тошкент осмонида кузатилган ёрқин объект метеор ёки болид эмаслиги айтилди. Ҳодиса Хитойдан учирилган ракета билан боғлиқ бўлиши мумкин.
19 сентябрь куни кечқурун Тошкент осмонида ортидан узун из қолдириб ҳаракатланган жуда ёрқин объект кузатилди. Ҳодиса шаҳар аҳолиси томонидан фото ва видеоларга қайд этилди.
Фанлар академияси Мирзо Улуғбек номидаги Астрономия институти мутахассислари тарқалган фото ва видеоматериалларни дастлабки таҳлилдан ўтказди. Институт катта илмий ходими Камолиддин Эргашевга кўра, объектнинг ташқи кўриниши, ҳаракат хусусияти ва ҳосил қилган изи метеор ёки болидга хос эмас.
Мутахассисларнинг дастлабки баҳолашича, кузатилган ҳодиса ракета ёки унинг юқори босқичи билан боғлиқ бўлиши мумкин.
Қайд этилишича, ҳодиса 19 сентябрь куни Хитойнинг Таиюан космодромидан учирилган Long March-2D (Chang Zheng-2D) ташувчи ракетаси парвози билан мос келмоқда. Мазкур ракета PIESAT-2 туркумидаги тўртта сунъий йўлдошни орбитага олиб чиққан.
Дастлабки орбитал ҳисоб-китобларга кўра, ракетанинг учирилиш вақти, орбитаси, шунингдек, Тошкент осмонида объект кузатилган вақт ва йўналиш ўртасида мослик мавжуд.
Шу боис ҳозирча энг эҳтимоли юқори тахмин — Тошкент осмонида кузатилган ҳодиса ушбу космик учиришнинг ракета босқичи ёки ундан кейинги орбитал жараёнлардан бири билан боғлиқ.
Бироқ мутахассислар объектни айнан Long March-2D ракетасининг муайян қисми деб қатъий идентификация қилишга ҳали эрта эканини таъкидламоқда. Янги учирилган объектлар бўйича халқаро орбитал каталогларда зарур элементлар ва ҳодисага оид мустақил идентификация ҳозирча мавжуд эмас.
Астрономия институтининг дастлабки хулосасига кўра, Тошкент осмонида кузатилган ёрқин ҳодиса метеор ёки болидга хос эмас.
