616 млн сўмлик мукофот: «Йил ўқитувчиси» ғолиблари аниқланди
Танловда 46 мингдан ортиқ педагог иштирок этди. Ғолиблар уч босқичда сараланди.
2026 йилда илк бор ўтказилган «Йил ўқитувчиси» танловининг ғолиблари маълум бўлди. Танловда республика бўйича 46 минг нафардан ортиқ педагог иштирок этди.
Танлов якунларига кўра, 208 та туман ва шаҳардан биринчи ўринни эгаллаган 208 нафар педагог ғолибликни қўлга киритди. Уларнинг ҳар бирига 616 млн сўмдан, яъни базавий ҳисоблаш миқдорининг 1 400 баравари миқдорида пул мукофоти берилади.
Маълум қилинишича, танлов педагогларнинг касбий маҳоратини ошириш ва таълим сифатини юксалтиришни рағбатлантириш мақсадида ташкил этилган. Танлов Президент ташаббуси билан жорий этилган.
«Йил ўқитувчиси» танлови 2026 йилдан бошлаб ҳар икки йилда бир марта ўтказилади. Унда номзодлар ўзлари дарс берадиган битта фан бўйича, бошланғич синф ўқитувчилари эса бошланғич таълим йўналишида иштирок этади. Рўйхатдан ўтиш вазирликнинг махсус платформаси орқали амалга оширилади.
Танлов уч босқичда ўтказилади. Биринчи босқичда номзодларнинг мутахассислик фани, педагогик маҳорати ва касб стандарти бўйича назарий билимлари баҳоланади.
Иккинчи босқичда педагогик маҳорат ҳакамлар ҳайъати ҳамда педагоглар томонидан белгиланган мезонлар асосида баҳоланади. Бунда номзод ўтган дарснинг видеоёзуви махсус платформага жойлаштирилади.
Учинчи босқичда эса номзодларнинг маънавий-маърифий фаолияти ва китобхонлик даражаси баҳоланади.
