17 ёшли ўқувчи гашиш билан ушланди: жўнатма Россиядан юборилган
Гиёҳвандлик воситалари консерва қутисига яширилган бўлган.
Тошкент вилоятининг Чирчиқ шаҳрида Россиядан юборилган жўнатмани қабул қилиб олаётган 17 ёшли мактаб ўқувчиси 852,2 грамм гашиш билан ушланди.
Божхона қўмитаси Контрабандага қарши курашиш бошқармаси ДХХ ва ИИВнинг тезкор тузилмалари билан ҳамкорликда «халқаро назорат остида етказиб бериш» тезкор тадбирини ўтказган.
Тадбир давомида 2009 йилда туғилган вояга етмаган шахс Россиядан юборилган жўнатмани қабул қилиб олаётган вақтда қўлга олинган.
Жўнатма холислар иштирокида текширилганда, тўртта консерва қутиси ичига 852,2 грамм гашиш яширилгани аниқланган.
Шунингдек, ўсмирнинг яшаш хонадони кўздан кечирилганда электрон тарозилар, гиёҳвандлик воситаларини қадоқлашга мўлжалланган «зип» пакетлар ва изоляцион ленталар топилган. Улар ашёвий далил сифатида олиб қўйилган.
Божхона қўмитаси маълумотига кўра, аниқланган 852,2 грамм гашиш ўртача ҳисобда 60 минг дозадан ортиқни ташкил этади. Унинг қора бозордаги қиймати қарийб 600 минг доллар деб баҳоланган.
Ҳолат юзасидан Божхона қўмитаси томонидан жиноят иши қўзғатилган. Ҳозирда терговга қадар ва тергов ҳаракатлари олиб борилмоқда.
