Ангренда бемор «пробасиз» укол ортидан комага тушдими? Ҳолат юзасидан текширув бошланди
Текширув якунлари асосида ҳолатга ҳуқуқий ва тиббий жиҳатдан баҳо берилиши маълум қилинди.
Ангрендаги хусусий клиникада 20 ёшли йигит тиббий ёрдам кўрсатилганидан сўнг аҳволи оғирлашгани ҳақидаги хабарлар юзасидан текширув бошланди. Бу ҳақда Тошкент вилояти соғлиқни сақлаш бошқармаси хабар берди.
Тарқалган хабарларга кўра, бемор шамоллаш белгилари билан шу йилнинг 31 июль куни Ангрен шаҳридаги «Аngren medical center» хусусий клиникасига мурожаат билан борган ҳамда клиникада «проба»сиз томирига томчи дори юборилиши ортидан соғлиги ёмонлашиб ҳушини йўқотган. Айни дамда бемор Ангрен шаҳар марказий шифохонасининг реанимация бўлимида экани айтилмоқда.
Тошкент вилояти соғлиқни сақлаш бошқармаси қайд этишича, ҳодисани ҳар томонлама ва холис ўрганиш мақсадида ишчи гуруҳ тузилиб, хизмат текшируви тайинланди.
Текширув давомида беморга кўрсатилган тиббий ёрдам сифати, даволаш жараёни ҳамда ҳолатнинг келиб чиқиш сабаблари тегишли мутахассислар иштирокида ўрганилади.
Текширув якунлари асосида ҳолатга ҳуқуқий ва тиббий жиҳатдан баҳо берилади. Қўшимча маълумотлар тақдим этилиши айтилган.
