Олимовнинг Анор банкдаги акцияларининг 50 фоизи нидерландиялик инвестор тасарруфига ўтиб кетди

 

Францияда ўғирланиб кетиши кенг жамоатчиликка танилган Қаҳрамонжон Олимовнинг Анор банк устав капиталидаги улуши 99,38 фоиздан 49,38 фоизга қисқарди. Ягона корпоратив ахборот портал маълумотларига кўра, Олимовга тегишли акцияларнинг 50 фоизи Нидерландияда рўйхатда ўтган Бекамин Б.В компанияси тасарруфига ўтган. 

 

2025 йил учинчи чораги якунларига кўра Анор банк Иқтисодий тадқиқотлар ва ислоҳотлар маркази рейтингида Ўзбекистондаги энг фаол молия институтлари орасида олтинчи ўринни эгаллаганди ва аввалги даврга нисбатан бир поғона пастлаган. Октябрь бошига келиб банкнинг соф фойдаси 235,9 млрд сўмни, жами активлари эса 13,5 трлн сўмни ташкил қилган. 

 

Эслатиб ўтамиз, аввалроқ Франциянинг Le Monde газетаси 2025 йил ёзида Олимов Парижда ўғирлаб кетилгани ҳақида хабар берган эди. Газетанинг ёзишича,  Олимов  Нитсса яқинидаги виллада зўравонлик билан ушлаб турилган, қийноққа солинган ва 10 млн доллар товон пули талаб қилинган, қисман тўловдан сўнг озод этилган. 

 

Бироқ кейинчалик The Insider ва L’Express нашрлари қўшма суриштирувида ушбу воқеа саҳналаштирилган бўлиши мумкинлигини билдирувчи суриштирув материални эълон қилди. Журналистлар “ўғирлаш” қарз мажбуриятларидан қочиш учун уюштирилган бўлиши эҳтимолини илгари сурди. 

 

Суриштирувда кўрсатмалардаги номувофиқликлар, “ўғирловчи” билан ёзишмаларнинг дўстона оҳанги ва “озодликдан сўнг” йўл чиптасининг айбланувчи ҳайдовчиси картаси орқали тўлангани келтирилди. ОАВ тахминига кўра, саҳналаштиришдан мақсад активларни легаллаштириш ва сиёсий бошпана олиш бўлган.