Фарғонадаги боғчада заҳарланган болаларнинг 22 нафари соғайди
Мазкур болалар ҳозирда амбулатор кузатув остига олинган.
Фарғона вилоятида мактабгача таълим ташкилоти ёшидаги болалар ўртасида қайд этилган оммавий заҳарланиш ҳолати юзасидан даволаш ва текширув ишлари давом этмоқда.
Вилоят соғлиқни сақлаш бошқармаси матбуот хизматининг маълум қилишича, 25 февраль соат 08:00 ҳолатига кўра, вилоят юқумли касалликлар шифохонаси ҳамда Фарғона шаҳар болалар шифохонасида даволанаётган 22 нафар боланинг соғлиги яхшилангани сабабли улар уйига жавоб берилган. Мазкур болалар ҳозирда амбулатор кузатув остига олинган.
Шифохоналарда даволанаётган қолган беморларнинг умумий аҳволи мутахассислар томонидан нисбатан қониқарли деб баҳоланмоқда. Тиббиёт ходимлари томонидан уларнинг соғлиғи доимий назоратга олинган бўлиб, кун якунига қадар яна бир неча нафар болани уйига жавоб бериш режалаштирилгани маълум қилинди.
Ҳолат юзасидан санитария-эпидемиологик хизмат ва бошқа тегишли мутасадди идоралар томонидан кенг қамровли ўрганиш ишлари олиб борилмоқда. Хусусан, мактабгача таълим ташкилотлари ошхоналари ҳамда озиқ-овқат маҳсулотларини етказиб берувчи корхоналарда текширувлар ташкил этилиб, зарур лаборатория намуналари олиниб таҳлилга юборилган.
Мутахассислар томонидан олинган лаборатория таҳлиллари натижалари 10 кун муддат ичида жамоатчиликка расман эълон қилиниши кутилмоқда.
Ҳолат тегишли идоралар томонидан белгиланган тартибда ўрганилмоқда.
Эслатиб ўтамиз, аввалроқ Фарғона вилоятида боғча ёшидаги болаларнинг оммавий заҳарланиши қайд этилгани ва жиноят иши очилгани ҳақида хабар берилган эди.
