Тошкентда ЙПХ ходимининг ўлимига сабаб бўлган ўқувчи BMW'ни олиб қочгани аниқланди
У танишининг опасига тегишли ювиш шохобчасида калити билан қолдирилган BMW русумли автомобилни ҳайдаб кетган.
Тошкент шаҳри Миробод туманида йўл-патруль хизмати (ЙПХ) инспектори иштирокида содир бўлган оғир йўл-транспорт ҳодисаси юзасидан жиноят иши қўзғатилди.
Тергов ҳужжатларига кўра, 2010 йилда туғилган, мактабнинг 10-синф ўқувчиси бўлган вояга етмаган шахс 25 февраль куни соат 21:30 ларда танишининг опасига тегишли автомобиль ювиш шохобчасида калити билан қолдирилган BMW русумли автомобилни ҳайдаб кетган.
Маълум қилинишича, гумонланувчи Миробод тумани Нукус кўчасида ҳаракатланаётган вақтида транспорт оқимини тартибга солиш мақсадида тўхташ ишорасини берган ЙПХ инспектори Ҳосилбек Эшназаровнинг қонуний талабига бўйсунмаган. Ҳайдовчилик гувоҳномаси ҳамда транспорт воситасига оид ҳужжатларга эга бўлмаган вояга етмаган шахс жавобгарликдан қочиш мақсадида бошқа автомобилларни кескин айланиб ўтиб, авариявий вазият юзага келтирган ҳамда хизмат вазифасини бажараётган инспекторни уриб юборган.
Кўрсатилган зарур тиббий ёрдамга қарамай, ЙПХ инспектори 27 февраль куни вафот этган.
Дастлабки тергов давомида вояга етмаган шахс ҳаракатларида транспорт воситасини олиб қочиш ҳамда жабрланувчининг ўлимига сабаб бўлган қасддан баданга оғир шикаст етказиш аломатлари мавжудлиги аниқланган. У Жиноят кодексининг 267-моддаси 1-қисми ва 104-моддаси 3-қисми «д» бандида назарда тутилган жиноятларни содир этганликда гумон қилинувчи сифатида жалб этилган.
Ҳозирда гумонланувчи Жиноят-процессуал кодексининг 221-моддаси тартибида ушланган. Тергов ҳаракатлари Бош прокуратура томонидан алоҳида назоратга олинган.
