Эрон АҚШ билан музокара ўтказишни рад этгани фонида нефть нархлари кўтарилди
Brent маркали нефтнинг фьючерслари 2 фоизга ошди.
Эрон ва АҚШ-Исроил ўртасидаги можаро фонида нефть нархлари кескин ошмоқда. Бу ҳақда Al Jazeera хабар бермоқда.
Қайд этилишича, халқаро эталон бўлган Brent маркали нефтнинг фьючерслари деярли 2 фоизга кўтарилиб, бир баррель учун 104 доллардан ошди.
Бунга Эрон Ташқи ишлар вазири Аббос Ароқчи давлат телевидениесига берган интервьюсида Теҳрон ҳозирча АҚШ билан тўғридан-тўғри музокара олиб бормаётганини маълум қилгани сабаб бўлди.
Аввалроқ АҚШ президенти Доналд Трамп АҚШ ва Эрон Яқин Шарқда тўлиқ ва умумий низоларни ҳал этиш бўйича музокаралар ўтказганини маълум қилганидан сўнг Brent маркали нефть 13 фоизга тушиб, 96 долларни ташкил қилган эди.
Шу билан бирга, Оқ уй матбуот котиби Керолайн Левитт Эронни ҳарбий мағлубиятни қабул қилмаса, янада қаттиқроқ зарба билан огоҳлантирди.
Бироқ Аббос Ароқчи Эронга музокара таклиф этилаётгани АҚШнинг мағлубиятни тан олганидан дарак беришини билдирган.
Можаро натижасида Ҳўрмуз бўғози деярли ёпилди, натижада глобал нефть етказиб беришининг бешдан бир қисмини таъминлайдиган йўл чекланди. Энергия нархлари сўнгги ҳафталарда 40 фоиздан ошди, кўплаб мамлакатлар ёнилғи тақсимоти ва энергия тежаш чораларини жорий этди.
Maritime разведка фирмаси Windward маълумотларига кўра, можаро бошланишидан олдин бўғоздан кундалик 120 та кема ўтган бўлса, сешанба куни атиги 4 кема транзит қилган. Бозор кузатувчилари кемалар бўғоздан эркин ўтишини таъминлагунча нархлар ошишда давом этишини айтмоқда.
Осиё фонд бозорлари ҳам пасайиш билан очилди: Япония Никкеи 225, Жанубий Корея KOSPI ва Гонконг Hang Seng индекси зарар кўрди.
