"Акамнинг шунча йил йиққан обрўсига путур етказдим"
ППХ ходимига мушт туширган ҳайдовчи узр сўради.
Тошкент шаҳрининг Яшнобод туманида ППХ ходимига қўл кўтарган маст ҳайдовчи қилган ишидан пушаймонлигини билдириб, барчадан кечирим сўради.
Аввалроқ Тошкент шаҳрида маст ҳолда автомобиль бошқариб, йўл-транспорт ҳодисасига сабаб бўлган фуқаронинг ИИО ходимига қаршилик кўрсатиб қўл кўтаргани ҳақида хабар берилганди.
Мазкур воқеадан сўнг ППХ ходимига қўл кўтарган ҳайдовчининг ички ишлар тизимида ишловчи акаси воқеага аралашишга урингани учун ишдан олинган.
“Спиртли ичимлик истеъмол қилганим сабабли гап талашдик. Кейин шу пост-патруль хизматлари ходимлари етиб келиб, ўзаро жанжаллашиб қолдик. Шундан сўнг кайфда қўл кўтариб юбордим. Қилган ишимдан мингдан-минг афсусдаман, кечиришларингизни сўрайман. Барчадан узр сўрайман. Транспорт ҳодисаси содир қилиб қўйганимда, мени деб бошқалар жабр кўриши мумкин эди. Акамнинг ҳам шунча йил ишлаб, йиққан обрўсига путур етказиб қўйдим. Ҳаммасига ўша спиртли ичимлик сабабчи экан. Бу ҳол бошқа қайтарилмайди. Қилган ишимдан пушаймонман”, деган Шерзод Пардаев.
Тошкент шаҳар ИИББ маълумотига кўра, 30 март куни тунги вақтда Яшнобод туманида Malibu ва Leapmotor русумли автомобиллар иштирокида тўқнашув юз берган. Воқеа ҳақда Leapmotor ҳайдовчиси хабар бергач, ЙПХ ҳодимлари ҳодиса жойига етиб келган.
ЙПХ ходимлари Malibu ҳайдовчисини алкотестер орқали текширувдан ўтказмоқчи бўлганда ҳайдовчи ходимларга қаршилик кўрсатиб улардан бирининг юзига икки марта мушт туширган.
Шундан сўнг ходимлар ўзлари ва атрофдагилар хавфсизлигини таъминлаш мақсадида махсус воситалар қўллаб, уни зарарсизлантирган.
Кейин эса ҳайдовчига нисбатан Жиноят кодексининг 219-моддаси 2-қисми ҳамда 277-моддаси 3-қисми “г” банди билан жиноят иши қўзғатилиб, қўлга олинган. Тергов давом этмоқда.
