Президент Қувада агроволтаика технологияси асосидаги мажмуа билан танишди
Мажмуада 100 дан ортиқ оила даромади ошган, 350 нафар фуқаро бандлиги таъминланган.
Президент Шавкат Мирзиёев Фарғона вилоятига ташрифи доирасида Қува туманида ташкил этилган, агроволтаика технологияси асосида фаолият юритаётган илғор қишлоқ хўжалиги мажмуаси билан танишди.
Мамлакатимизда қишлоқ ва сув хўжалигида энергия сарфи ортиб бораётгани сабабли «яшил» энергия манбаларини кенгайтириш устувор йўналиш сифатида белгиланган. Шу нуқтайи назардан агроволтаика технологияси бир ер майдонида ҳам қишлоқ хўжалиги маҳсулотларини етиштириш, ҳам қуёш панеллари орқали электр энергияси ишлаб чиқариш имконини бериши билан аҳамиятлидир. Ҳисоб-китобларга кўра, Ўзбекистонда ушбу йўналишда 10 гигаваттгача қувват яратиш салоҳияти мавжуд.
Мазкур ёндашув қуёшли иқлимга эга ҳудудларда, хусусан, Ўзбекистон шароитида юқори самарадорликка эга ҳисобланади. Қуёш панеллари экинларни ортиқча иссиқликдан ҳимоя қилиб, тупроқ намлигини сақлашга ёрдам беради. Ўз навбатида, экинлар ҳам ер юзасидаги ҳароратни мувозанатда ушлаб, қуёш панелларининг барқарор ишлашига кўмаклашади.
Мажмуада сув тежамкорлиги ва самарадорликни оширишга қаратилган илғор технологиялар жорий этилган. Хусусан, Австриянинг “Bauer” компанияси технологияси асосида ёмғирлатиб суғориш тизими қўлланилмоқда. Ушбу усул сувни бир маромда тақсимлаш, тупроқ намлигини сақлаш, ўғитларни мақсадли қўллаш ҳамда ҳосилдорликни ошириш имконини беради.
Синов натижаларига кўра, ушбу технология сув сарфини 40 фоизга, ўғит сарфини 35 фоизга, қўл меҳнатини 90 фоизга қисқартирган ҳамда ҳосилдорликни 25 фоизга оширишга хизмат қилган.
110 гектар майдонда ташкил этилган мажмуада интенсив боғдорчилик, чорвачилик ва балиқчилик йўналишлари уйғунлаштирилган. Бу мамлакатимизда қайта тикланувчи энергия ва сув тежовчи технологиялар асосида яратилган илк агромажмуалардан биридир.
Ҳудудда ўрнатилган 10 мингта қуёш панели электр энергияси ишлаб чиқариш билан бирга экинлар учун соя яратиш ва тупроқ намлигини сақлашга хизмат қилмоқда. Балиқчилик тизимида эса энергия ҳисобига кислород бериш жараёни йўлга қўйилган, сув эса минерал моддаларга бой ҳолда боғ ва узумзорларни озиқлантиришда фойдаланилмоқда.
Чорвачилик йўналишида қорамоллар қуёш панеллари соясида боқилиб, табиий озуқа билан таъминланмоқда, ҳосил бўлган органик ўғит эса ер унумдорлигини оширишга хизмат қилмоқда. Шу тариқа мажмуада энергия, сув, озуқа ва ўғит бир-бирини тўлдирувчи ягона тизим сифатида фаолият юритмоқда.
Мазкур ёндашув қишлоқ хўжалиги самарадорлигини ошириш, маҳсулот таннархини камайтириш, экспорт салоҳиятини кенгайтириш ҳамда янги иш ўринларини яратишга хизмат қилмоқда. Айни пайтда мажмуада 100 дан ортиқ оиланинг даромади ошган, 350 нафар фуқаронинг бандлиги таъминланган, экспорт ҳажми эса 2,5 миллион долларни ташкил этади.
Келгусида ушбу тажрибани республиканинг 13 та ҳудудида 2 минг гектар майдонда кенг жорий этиш режалаштирилган.
Ташриф давомида давлат раҳбари агродронлар ёрдамида экинларни парвариш қилиш ва мониторинг қилиш жараёнлари билан ҳам танишди.
