Ўзбекистонда карталар ўртасида комиссиясиз ўтказмалар жорий этилиши мумкин

 

Президент Шавкат Мирзиёев ишлаб чиқариш корхоналарининг барқарорлигини таъминлаш ҳамда тадбиркорлар дуч келаётган муаммоларни ҳал этишга қаратилган тақдимот билан танишди. Унда рақамлаштириш ва нақд пульсиз тўловларни кенгайтириш масалаларига алоҳида эътибор қаратилди.

 

Таъкидланишича, сўнгги йилларда товар ва хизматлар учун тўловлар тобора кўпроқ нақд пульсиз шаклга ўтмоқда. Шу боис аҳоли ва бизнес учун бундай тўловларни янада қулайлаштириш зарурлиги қайд этилди. Бу борада банк инфратузилмасини ривожлантириш, комиссия тизимини такомиллаштириш ва рағбатлантирувчи механизмларни кенгайтириш таклиф қилинди.

 

Хусусан, жисмоний шахсларнинг ўз банк карталари ўртасидаги пул ўтказмаларини комиссиясиз амалга ошириш, нақдсиз тўловларни аҳоли учун қулай бўлган шаклларини кўпайтириш, умумий овқатланиш, алкоголь, тамаки ва ёқилғи сотиш соҳаларида харид чеки бўйича ҳисобланган кешбекни тезкор қайтариш имкониятини яратиш таклиф этилди. 

 

Банк операциялари хавфсизлигини ошириш мақсадида жорий этилган фирибгарликка қарши тизим доирасида СМС-хабарномалар билан боғлиқ харажатларни қайта кўриб чиқиш, уларнинг ўрнига мобил иловалар орқали билдиришномалар юбориш ёки биометрик идентификация каби муқобил ечимларни жорий этиш имкониятлари ҳам муҳокама қилинди.

 

Бундан ташқари, солиқ маъмуриятчилигини такомиллаштириш, жумладан, солиқ имтиёзларини қўллашда юзага келадиган баҳсли ҳолатларни бартараф этиш, солиқ қарзлари бўйича жарималарнинг асосий қарз миқдоридан ошмаслиги принципини жорий этиш таклиф қилинди.

 

Тадбиркорлик фаолиятини қўллаб-қувватлаш доирасида импорт жараёнларини соддалаштириш, ортиқча ҳужжатларни қисқартириш, хорижда савдо уйлари ва ваколатхоналар очиш тартибини енгиллаштириш ҳамда миллий маҳсулотларни халқаро бозорларда тарғиб қилиш механизмларини кенгайтириш масалалари ҳам кўриб чиқилди.

 

Давлат раҳбари тадбиркорлик йўлидаги ортиқча тўсиқларни камайтириш, назорат ва тартибга солиш механизмларини соддалаштириш ҳамда рақамлаштириш жараёнларини бизнес учун қулайлик яратадиган самарали воситага айлантириш муҳимлигини таъкидлади.