Давлат харидларида 23 миллиард сўмдан ортиқ қонунбузилишлар аниқланди
Аниқланган ҳолатлар юзасидан буюртмачи ташкилотларга нисбатан иш қўзғатилиб, мансабдор шахсларга тегишли чоралар кўрилган.
Қўмита маълумотига кўра, ўтказилган ўрганишлар натижасида бир нечта давлат ташкилотлари томонидан амалга оширилган умумий қиймати 23 миллиард сўмдан ортиқ бўлган давлат харидларида қонунбузилиш ҳолатлари аниқланган.
Хусусан:
— Ёшлар ишлари агентлиги томонидан ўтказилган умумий қиймати 9,1 миллиард сўмдан ортиқ бўлган 6 та давлат харидида;
— Инновацион ривожланиш агентлиги томонидан ташкил этилган қарийб 8 миллиард сўмлик 6 та танлов савдосида;
— Мактабгача ва мактаб таълими вазирлиги томонидан амалга оширилган 6,7 миллиард сўмга яқин қийматдаги 10 та тендер жараёнида қонунчилик талаблари бузилгани аниқланган.
Таъкидланишича, ушбу савдоларда рақобатни чекловчи ёки чекланишига олиб келиши мумкин бўлган ҳолатларга йўл қўйилган.
Аниқланган ҳолатлар юзасидан Рақобат қўмитасининг Махсус комиссияси томонидан буюртмачи ташкилотларга нисбатан белгиланган тартибда иш қўзғатилиб, қонунбузилишларни бартараф этиш ҳамда келгусида бу каби ҳолатларнинг такрорланишига йўл қўймаслик юзасидан бажарилиши мажбурий бўлган кўрсатмалар берилган.
Бундан ташқари, қонунбузилишларга йўл қўйган айрим мансабдор шахсларга нисбатан маъмурий жавобгарлик чоралари қўллаш масаласи кўриб чиқилиб, тегишли материаллар суд органларига юборилган.
