Қурилиш материаллари саноатидаги 457 корхона молиявий соғломлаштирилади
2040 йилгача қуриладиган уй-жойлар сонини икки баробарга ошириб, йилига 280 мингта уй-жой барпо этиш, шунингдек, “Янги Ўзбекистон” массивлари сонини 61 тадан 120 тага етказиш режалаштирилган.
Президент Шавкат Мирзиёев раислигида ўтказилган видеоселектор йиғилишида қурилиш материаллари саноатини ривожлантириш, ички бозор талабини қондириш ва маҳаллий ишлаб чиқарувчиларнинг йирик инвестиция лойиҳаларидаги иштирокини кенгайтириш масалалари муҳокама қилинди.
Йиғилишда қайд этилишича, йил бошида аҳолини уй-жой билан таъминлаш бўйича қабул қилинган дастурга мувофиқ, 2040 йилгача қуриладиган уй-жойлар сонини икки баробарга ошириб, йилига 280 мингта уй-жой барпо этиш, шунингдек, “Янги Ўзбекистон” массивлари сонини 61 тадан 120 тага етказиш режалаштирилган.
Бугунги кунда мамлакатда ҳар йили 20–25 миллион квадрат метр ҳажмдаги турар жой ва тижорат объектлари фойдаланишга топширилмоқда. Натижада уй-жой ва тижорат қурилишининг ўзи йилига камида 10 миллиард долларлик қурилиш материалларига талаб яратмоқда.
Давлат раҳбари Тошкент халқаро инвестиция форумида хорижий ҳамкорларга қиймати 27 миллиард долларлик янги инфратузилма лойиҳалари таклиф этилганини ҳам эслатиб ўтди.
Жумладан, Жиззах вилоятида атом электр станцияси, Тошкент вилоятида 4-мисни бойитиш фабрикаси, Ўрта Чирчиқ туманида Янги Тошкент аэропорти, Янги Тошкент ҳудудида 55 минг ўринли футбол стадиони ҳамда 282 километр узунликдаги Тошкент–Самарқанд автомобиль йўли каби йирик лойиҳаларни амалга ошириш режалаштирилган.
Таъкидланганидек, бундай лойиҳаларда фойдаланиладиган қурилиш материалларига сифат, стандарт ва сертификатлаш бўйича юқори талаблар қўйилади. Шу боис маҳаллий ишлаб чиқарувчиларни йирик ва мегалойиҳалар билан боғлайдиган янги тизим яратиш зарурлиги қайд этилди.
Йиғилишда инвесторлар томонидан йирик лойиҳалар учун импорт қилинадиган қурилиш материалларини қўшилган қиймат солиғидан озод қилиш бўйича таклифлар илгари сурилгани маълум қилинди. Шу билан бирга, маҳаллий ишлаб чиқарувчилар ҳам ўз маҳсулотлари сифат ва стандартлар бўйича рақобатга тайёр эканини билдириб, ушбу имтиёзларни маҳаллий маҳсулотларга ҳам татбиқ этишни сўрамоқда.
Шу муносабат билан мутасаддиларга йирик ва мегалойиҳаларга маҳаллий ҳамда импорт маҳсулотларини етказиб беришда тенг рақобат шароитларини яратишга қаратилган қарор лойиҳасини ишлаб чиқиш топширилди.
Йиғилишда соҳа корхоналарининг молиявий ҳолати ҳам таҳлил қилинди. Қайд этилишича, қурилиш материаллари саноатидаги 457 та корхонанинг кредитлар бўйича муддати ўтган қарздорлиги 3,5 триллион сўмга етган.
Бунга асосий сабаб сифатида айрим корхоналар маҳсулотларининг таннархи юқорилиги ҳамда бозор талабларига тўлиқ мос келмаслиги оқибатида рақобатбардошликнинг пасайгани кўрсатилди.
Президент масъулларга ушбу 457 та корхонанинг фаолиятини жойига чиққан ҳолда ўрганиш, уларни молиявий соғломлаштириш бўйича қисқа муддатли дастур ишлаб чиқиш ва мазкур мақсадлар учун 50 миллион доллар маблағ ажратишни топширди.
Ажратиладиган ресурслар ишлаб чиқариш қувватларини модернизация қилиш, маҳсулот таннархини камайтириш ва ички ҳамда ташқи бозорларда талаб юқори бўлган маҳсулотлар ишлаб чиқаришни кенгайтиришга йўналтирилади.
