Янги Тошкент лойиҳаси Озарбайжон Президентига тақдимот қилинди

Ўзбекистон Республикаси Президенти Шавкат Мирзиёев ва Озарбайжон Республикаси Президенти Илҳом Алиев Янги Тошкент шаҳрини барпо этиш дирекциясига ташриф буюрди.

 

 

Ташриф давомида Озарбайжон етакчисига Янги Тошкентнинг бош режаси, қурилиш ишларининг бориши, шаҳарнинг транспорт ва муҳандислик инфратузилмаси, шунингдек, истиқболдаги ривожланиш режалари ҳақида тақдимот қилинди.

 

 

Янги Тошкент шаҳри 20 минг гектар майдонда барпо этилмоқда. Истиқболда бу ерда 2 миллион аҳоли яшаши учун шароит яратилиши режалаштирилган. 2034 йилга қадар шаҳарда 200 мингта хонадон қурилиши кўзда тутилган.

 

 

Лойиҳанинг 6 минг гектарни қамраб олган биринчи босқичида замонавий турар жойлар, ижтимоий ва бизнес объектлари, таълим ҳамда маданият масканлари бунёд этилмоқда.

 

 

Хусусан, “Янги Ўзбекистон” университети, Низомий номидаги Ўзбекистон миллий педагогика университети ва бошқа олий таълим муассасаларининг кампуслари қурилмоқда.

 

Янги Тошкентни барпо этишда замонавий урбанистика, “яшил шаҳар” ва энергия самарадорлиги тамойилларига устувор аҳамият қаратилмоқда. Муҳандислик коммуникацияларини ер остида жойлаштириш, энергия тежамкор технологиялардан фойдаланиш, кенг яшил ҳудудлар ва жамоат маконларини ташкил этиш режалаштирилган.

 

 

Шаҳарнинг транспорт инфратузилмаси ҳам замонавий талаблар асосида шакллантирилади. Янги кўприклар ва метро линияси, пиёдалар ҳамда велосипед йўлаклари Янги Тошкентни пойтахтнинг мавжуд ҳудудлари билан узвий боғлайди.

 

Шунингдек, шаҳарда давлат идоралари, илмий ва маданий марказлар, меҳмонхоналар, сервис ҳамда бизнес мажмуалари барпо этилади. Лойиҳани амалга оширишга маҳаллий ва хорижий инвесторлар кенг жалб қилинмоқда.

 

 

Ташриф давомида Президент Илҳом Алиевга Янги Тошкентнинг макети ҳам намойиш этилиб, шаҳарда барпо этилиши режалаштирилаётган йирик объектлар ҳақида батафсил маълумот берилди.