Шавкат Мирзиёев ва Илҳом Алиев Низомий номидаги Педагогика университетининг янги кампусини очди
Мажмуада жами 20 минг нафар талабага мўлжалланган ўқув бинолари ҳамда 5 минг ўринли талабалар турар жойлари ташкил этилиши режалаштирилган.
Ўзбекистон Президенти Шавкат Мирзиёев ва Озарбайжон Президенти Илҳом Алиев Янги Тошкент шаҳрида Низомий номидаги Ўзбекистон Миллий педагогика университетининг янги кампусини тантанали очиш маросимида иштирок этди.
Тадбир аввалида давлат раҳбарлари Низомий Ганжавий ҳайкали ёнида дарахт экди.
Президентларга университет мажмуасининг қурилиш жараёнлари, таълим инфратузилмаси ва кампусни ривожлантириш истиқболлари ҳақида маълумот берилди.
40 гектар майдонда барпо этилаётган янги кампус қурилиши икки босқичда амалга оширилмоқда. Мажмуада жами 20 минг нафар талабага мўлжалланган ўқув бинолари ҳамда 5 минг ўринли талабалар турар жойлари ташкил этилиши режалаштирилган. Биринчи босқич доирасида 12 минг ўринли беш қаватли ўқув биноси ва замонавий лаборатория мажмуаси қуриб битказилди.
Шавкат Мирзиёев ва Илҳом Алиев кампусда яратилган ўқув ва илмий муҳит, ахборот-ресурс маркази ҳамда Низомий Ганжавий меросига бағишланган музей экспозицияси билан танишди.
Музей экспозициясидан буюк озарбайжон шоири ва мутафаккири Низомий Ганжавийнинг ҳаёти ва ижоди, унинг бой маънавий мероси, шунингдек, Ўзбекистон ва Озарбайжон халқлари ўртасидаги асрлик маданий ва адабий алоқаларни акс эттирувчи материаллар ўрин олган.
Тадбирда таълим, илм-фан ва маданият соҳаларидаги алоқалар икки қардош халқни янада яқинлаштириш, ёш авлодни умумий маънавий қадриятлар руҳида тарбиялашда муҳим аҳамият касб этиши таъкидланди.
Янги кампус замонавий таълим ва илмий инфратузилмаси билан педагог кадрлар тайёрлаш имкониятларини кенгайтиришга хизмат қилади.
