ОТМларда қолган бўш ўринлар рўйхати эълон қилинди
Ушбу ўринлар учун қўшимча танловга рўйхатдан ўтиш 22 августдан бошланган.
2026/2027-ўқув йили учун олий таълим ташкилотларининг бакалавриат йўналишларида 31 833 та вакант ўрин қолди. Билим ва малакаларни баҳолаш агентлиги ОТМларнинг умумий қабул параметрлари доирасида қолган вакант ўринлар рўйхатини эълон қилди.
Рўйхатда кундузги, кечки ва масофавий таълим шакллари бўйича ОТМлар, бакалавриат таълим йўналишлари ҳамда таълим тиллари кесимида мавжуд бўш ўринлар кўрсатилган. Шунингдек, тегишли йўналишлар бўйича фанлар мажмуаси ҳам келтирилган.
Қўшимча танловда ОТМларнинг бакалавриат таълим йўналишларига кириш имтиҳонларида қатнашиб, камида 56,7 балл тўплаган, бироқ талабаликка тавсия этилмаган абитуриентлар иштирок этиши мумкин.
Бундан ташқари, рўйхатдан ўтишнинг иккинчи босқичида ОТМ ва бакалавриат таълим йўналишини танламаган абитуриентларга ҳам фанлар мажмуаси ва таълим тили мос келадиган вакант йўналишларни танлаш имконияти берилган. Қўшимча танлов учун рўйхатдан ўтиш 22 августдан 28 августгача давом этади.
Абитуриентлар вакант ўринларга тўплаган баллари кетма-кетлигига қатъий риоя қилинган ҳолда, базавий тўлов-контракт асосида талабаликка тавсия этилади.
Танлов якунлари бўйича Билим ва малакаларни баҳолаш агентлиги тегишли танлов қайдномаларини шакллантириб, олий таълим ташкилотларига тақдим этади.
