ЙПХ мотоцикллари билан тўқнашган Оniх ҳайдовчиси вафот этди
Ҳодиса оқибатида патруль мотоциклини бошқариб келган ЙПХ ходими воқеа жойида вафот этган эди.
Тошкент шаҳрида Оniх русумли автомобиль ва ЙПХ инспекторларининг патруль мотоцикллари иштирокида содир бўлган йўл-транспорт ҳодисаси оқибатида қурбонлар сони икки нафарга етди.
Маълум қилинишича, ҳодисадан сўнг шифохонага икки нафар патруль мотоциклида бўлган ЙПХ ходими, бир нафар ЙПХ инспектори ҳамда Оних автомобили ҳайдовчиси олиб келинган. 27 июль куни Оniх ҳайдовчиси шифохонада вафот этган.
Қолган уч нафар жабрланувчининг аҳволи яхшилангани ва улар умумий бўлимга ўтказилгани билдирилган.
Эслатиб ўтамиз, мазкур йўл-транспорт ҳодисаси 2026 йил 16 июль куни соат 18:30 атрофида пойтахтнинг Дўрмон йўли кўчасида содир бўлган. Уч нафар ЙПХ инспектори патруль мотоциклларида хизмат вазифасини бажараётган вақтда Ғазалкент кўчасидан чорраҳага кириб келган Оniх автомобили билан тўқнашув юз берган.
Ҳодиса оқибатида патруль мотоциклини бошқариб келган бир нафар ЙПХ ходими воқеа жойида олган тан жароҳатлари сабаб вафот этган эди.
Аввалроқ ижтимоий тармоқларда ушбу ЙТҲ кортеж кузатуви вақтида содир бўлгани ҳақида тахминлар тарқалган. Бироқ Йўл ҳаракати хавфсизлиги хизмати бу маълумотларни асоссиз деб баҳолаб, фуқароларни тасдиқланмаган ахборотларни тарқатмасликка чақирган.
Айни пайтда мазкур ҳодиса юзасидан терговга қадар суриштирув ишлари давом эттирилмоқда.
