Хоманаий ҳужумда оғир яраланган, аммо тирик — Трамп
АҚШ президенти Хоманаий танасининг чап қисми, жумладан, қўли ва оёғидан оғир жароҳатланганини айтди.
Доналд Трамп Эрон Олий раҳбари Мужтабо Хоманаий Эронга қилинган зарбалар оқибатида ҳалок бўлмаганини, бироқ жиддий жароҳат олганини маълум қилди.
Трамп бу ҳақда америкалик радио бошловчиси Гленн Бекка берган интервьюсида айтган. Унинг сўзларига кўра, Хоманаий танасининг чап қисми, жумладан, қўли ва оёғидан оғир жароҳатланган.
“Менимча, у ўлмаган. У танасининг чап томонидан, қўли ва оёғидан жуда оғир жароҳатланган”, — дея таъкидлаган Трамп.
Мужтабо Хоманаий 2026 йил март ойида, отаси Али Хоманаий АҚШ ва Исроилнинг Эронга қарши ҳарбий операцияси вақтида ҳалок бўлганидан сўнг, Эроннинг Олий раҳбари этиб тайинланган эди.
Аввалроқ The New York Times нашри Мужтабо Хоманаий ҳужумларнинг дастлабки кунларида жароҳат олгани, бироқ хавфсиз жойга олиб чиқилгани ҳақида хабар берган эди. Май ойида эса Эрон ҳукуматидаги манбага таяниб, унинг жароҳатлари деярли битгани айтилган.
Август ойида Мужтабо Хоманаийнинг март ойида лавозимга келганидан буён илк суратлари ҳам оммага тарқалган эди.
