Шавкат Мирзиёев хориждаги фожиалар муносабати билан ҳамдардлик билдирди
Хитой ва Непалдаги табиий офатлар, шунингдек, Покистондаги ёнғин оқибатида ҳалок бўлган марҳумларнинг яқинларига сабр-тоқат, жабрланганларга эса тезроқ соғайишни тилади.
Ўзбекистон Республикаси Президенти Шавкат Мирзиёев Хитойнинг Тибет автоном районидаги Шигадзе шаҳар округида ва Непалнинг Тибет билан чегарасида юз берган кенг кўламли кўчки ва тошқин оқибатида кўплаб инсонлар ҳалок бўлгани, жароҳатлангани ҳамда катта иқтисодий талафот кўрилгани муносабати билан Хитой Халқ Республикаси Раиси Си Цзиньпин ва Непал Президенти Рам Чандра Пауделга ҳамдардлик йўллади.
Шунингдек, Шавкат Мирзиёев Исломобод шаҳридаги тиббиёт муассасасида юз берган кучли ёнғин оқибатида кўплаб болалар ҳалок бўлгани ва жароҳат олгани муносабати билан Покистон Ислом Республикаси Президенти Асиф Али Зардорий ва Бош вазири Шаҳбоз Шарифга ҳам ҳамдардлик билдирди.
Давлат раҳбари вафот этганларнинг оила аъзолари ва яқинларига сабр-тоқат, жароҳат олганлар тез фурсатда соғайиб кетишини тилади.
Маълумот ўрнида, табиий офат оқибатида Непалда камида 165 киши ҳалок бўлган, 826 киши бедарак йўқолган. Бедарак йўқолганлар орасида 500 га яқин хорижлик бор. Тибетнинг Жирўнг ҳудудида эса 558 киши, жумладан, 260 нафар хорижлик бедарак йўқолган. Хитой расмийларига кўра, ҳудудда уч киши ҳалок бўлган. Ҳозирда Непал ва Тибетда қидирув-қутқарув ишлари давом этмоқда.
Покистонда эса Тиббиёт фанлари институти (PIMS) туғруқхонасининг янги туғилган чақалоқлар бўлимида ёнғин содир бўлиб, камида 14 чақалоқ ҳалок бўлганди.
