“Халққа пул қандай сарфланаётгани ҳақида ҳисобот керак”: Алишер Қодиров Агентликка жавоб қайтарди

 

“Миллий тикланиш” демократик партияси раиси Алишер Қодиров Маданий мерос агентлигининг аввалги баёнотига жавоб берди.

 

Аввалроқ Қодиров Тошкентдаги айрим тарихий биноларни, жумладан, “рус рассомининг уйи” сифатида тилга олган объектни давлат томонидан муҳофаза қилиш масаласига эътироз билдирган эди. Шундан сўнг Маданий мерос агентлиги Тошкент шаҳри, Бобур кўчаси, 7-уйдаги бино юзасидан расмий муносабат билдириб, объектнинг тарихий ва маданий қийматини изоҳлаган. Агентлик маданий меросни «ўзимизники» ва «бегонаники»га ажратиш нотўғри эканини таъкидлаган эди.

 

Қодиров эса ўзининг Теlegram каналидаги муносабатида Агентлик Олий Мажлис Қонунчилик палатасидаги бюджет ҳисоботи вақтида депутатларнинг саволларига жавоб бериш ўрнига ижтимоий тармоқларда баёнот берганини айтди.

 

Унинг таъкидлашича, “Миллий тикланиш” партияси Агентликка берган саволларига жавоб олиш учун парламент сўрови ёки эшитув ваколатидан фойдаланишга ҳаракат қилади.

 

Қодиров, хусусан, Сармишсой, Шоҳизинда ва Миздакхон каби маданий мерос объектлари бўйича илгари билдирилган танқид ва таклифларга жавоб берилмаганини таъкидлаган.

 

Депутат Сармишсой ҳудудида катта маблағ сарфланганига қарамай, айрим очиқ ҳудудлар қаровсиз қолаётгани ҳақида савол қўйган. Шунингдек, Шоҳизинда яқинидан ўтувчи автомобиль йўли ёдгорликка зарар етказаётгани ва бу масалада тегишли чоралар кўрилаётган-кўрилмаётганини сўраган.

 

Бундан ташқари, Қодиров Бухорода қадимий Қуръон нусхаларидан бири сақланаётган жой, шунингдек, Довон давлати билан боғлиқ археологик мерос ҳудудларидан фойдаланиш масалаларини ҳам кўтарган.

 

Депутат Агентликнинг маданий мерос объектларига ажратилаётган маблағлардан фойдаланиши ва уларнинг муҳофазаси бўйича фаолиятига доир бошқа саволлар ҳам борлигини билдирган.

 

“Халққа эса унинг қадриятлари ва минг йиллик меросини асраш учун бераётган пулларини қандай ишлатилаётгани ҳақида ҳисобот керак, провокацион муносабатларингиз эмас”, дея ёзган Қодиров.

 

У, шунингдек, бу фикрлар депутат сифатидаги шахсий позицияси эканини, партия раиси сифатида эса Агентликнинг ҳисоботи ортидан парламентда сўз олишини маълум қилган.

 

Маданий мерос агентлиги эса аввалги муносабатида Бобур кўчаси, 7-уйдаги бино 1935 йилда қурилгани, унинг тарихи меъмор Алексей Шчусев, шунингдек, академиклар Тошмуҳаммад Қори-Ниёзий ва Василий Шишкин каби илм-фан вакиллари фаолияти билан боғлиқлигини билдирган. Агентлик маълумотига кўра, бино 2020 йилда Миллий рўйхатга киритилган ва 2021 йилда уни рўйхатдан чиқариш таклифи рад этилган.