Ҳормуз бўғози блокадаси: 45 млн кишига озиқ-овқат танқислиги хавф солмоқда
БМТга кўра, бўғоз орқали ўғит ташувчи кемалар қатнови тикланиши лозим.
Ривожланаётган мамлакатларда яшовчи қарийб 45 млн киши Ҳормуз бўғозининг блокадага олиниши сабабли озиқ-овқат танқислигига дуч келиши мумкин. БМТ бундай ҳолат гуманитар инқирозга олиб келиши мумкинлигидан огоҳлантирди.
БМТ Лойиҳаларга хизмат кўрсатиш бошқармаси директори Жоржи Морейра да Силва гуманитар инқирознинг олдини олиш учун Ҳормуз бўғози орқали ҳар куни камида 5–7 та ўғит ташувчи кема ўтказилиши кераклигини айтди.
Унинг таъкидлашича, ўғит етказиб бериш ривожланаётган мамлакатлар учун озиқ-овқат хавфсизлигини таъминлашда ҳал қилувчи аҳамиятга эга. Акс ҳолда, бу давлатлар гуманитар инқирозга дуч келиши мумкин.
Да Силва Яқин Шарқдаги можаро гуманитар ёрдам етказиб беришни тўхтатиш учун сабаб бўлмаслиги кераклигини билдирди. У Эрон ва АҚШни можаро бўйича келишувдан алоҳида равишда ўғит етказиб бериш муаммосини имкон қадар тезроқ ҳал қилишга чақирди.
