Наманган боғчасидаги жинсий зўравонлик: жиноят иши прокуратурага ўтказилди
Тергов устидан назорат шахсан Бош прокурор томонидан ўрнатилган.
Наманган вилояти Учқўрғон туманидаги давлат мактабгача таълим ташкилотида вояга етмаган шахс зўрлангани ҳолати юзасидан жиноят иши қўзғатилди. Бу ҳақда Бош прокуратура расмий баёнот берди.
Маълум қилинишича, ҳолат юзасидан Жиноят кодексининг 118-моддаси (номусга тегиш) ва 112-моддаси (ўлдириш ёки зўрлик ишлатиш билан қўрқитиш) билан жиноят иши қўзғатилган.
Жиноят иши доирасида бир нафар шахсга нисбатан қамоққа олиш эҳтиёт чораси қўлланган.
Ҳозирда жиноят иши Наманган вилояти прокуратурасининг иш юритувига ўтказилган ва тергов ҳаракатлари олиб борилмоқда. Тергов устидан назорат шахсан Бош прокурор томонидан ўрнатилган.
Прокуратура томонидан жиноят иши ҳар томонлама, тўлиқ ва холисона тергов қилиниши ҳамда вояга етмаган жабрланувчининг ҳуқуқ ва қонуний манфаатлари ҳимоя қилиниши таъминланиши билдирилди.
Жиноятга алоқадорлик, ҳолатларни яшириш ёки масъул шахсларнинг ҳаракатсизлиги билан боғлиқ аниқланган ҳар бир ҳолатга қонунчиликда белгиланган тартибда ҳуқуқий баҳо берилиши қайд этилган. Тергов натижалари ҳақида қонунчиликда белгиланган тартибда маълумот берилади.
