Афинада бино портлади: олти киши ҳалок бўлди
Портлаш газ инфратузилмаси билан боғлиқ бўлиши мумкинлиги айтилмоқда.
Афинанинг сайёҳлар гавжум Плака ҳудудида икки қаватли турар жой биноси портлаш оқибатида қулаб тушди. Ҳодиса натижасида олти киши ҳалок бўлган.
Греция ёнғин хавфсизлиги хизмати маълумотига кўра, қутқарувчилар вайроналар остидан олти кишининг жасадини топган. Улар бир хонадонда яшаган кекса эр-хотин ва бошқа хонадонда истиқомат қилган тўрт нафар сайёҳ бўлган.
Портлаш сабабларини аниқлаш учун ёнғин хавфсизлиги хизматининг тергов бўлинмаси воқеа жойида иш олиб бормоқда. Ҳудудда газ ҳиди сезилгани ҳақида хабарлар келиб тушган. Афина мери портлаш газ инфратузилмаси билан боғлиқ бўлиши мумкинлигини билдирган.
Полиция маълумотига кўра, ҳалок бўлган сайёҳлар икки америкалик жуфтлик бўлган. Улар жума куни соат 15:00 да Афинадан парвоз қилиши керак эди, бироқ аэропортга келмаган.
Портлаш натижасида яқин атрофдаги уйлар, дўконлар ва автомобилларга ҳам зарар етган. Бино қолдиқлари ва синган ойналар уч кварталгача бўлган ҳудудга сочилиб кетган.
Воқеа Афинанинг Акрополь ва Зевс ибодатхонаси каби машҳур сайёҳлик масканлари яқинида содир бўлган.
