“Бунёдкор” стадиони атрофи мухлислар ва масъул ходимлар билан тозаланди
Ўзбекистон миллий терма жамоаси ЖЧ-2026'га тантанали кузатилгач, стадион атрофидаги белгиланмаган жойга ташлаб кетилган чиқиндилар йиғилди.
“Бунёдкор” стадионида бўлиб ўтган футбол бўйича учрашувдан сўнг чиқиндиларни белгиланган жойга ташлаш масаласи яна кун тартибига чиқди.
“Бунёдкор” стадионида Ўзбекистон миллий терма жамоасини 2026-йилфи жаҳон Чемпионатига кузатиш маросими бўлиб ўтди. Бироқ футболчилар тантанали кузатилганидан сўнг стадион атрофида чиқиндилар қолдирилгани маълум бўлди.
Чиқиндиларни бошқариш ва циркуляр иқтисодиётни ривожлантириш агентлигининг билдиришича, футбол ишқибозлари ва соҳа ходимлари стадион ҳудудини чиқиндилардан тозалаш ишларида иштирок этган.
Агентлик томонидан эълон қилинган видеода кимдир чиқиндиларни тозалашга тезда киришиб кетган бўлса, яна кимдир вақт кечиб бўлиб кетганини, узоқ жойдан келганини айтиб йўлида давом этганини кўриш мумкин.
“Ҳурматли футбол ихлосмандлари, азиз юртдошлар Ватан шаъни ва ғалабаси деб ёнган юрагингиз ҳамиша унинг ободлиги йўлида ҳам масъулликни сезиб урсин”, дейилади агентлик хабарида.
